Ka vazhduar edhe sot seanca gjyqësore për rastin “Banjska”, ndër rastet më të rëndësishme të sigurisë që po trajtohen në gjykatat e Kosovës.
Pas një këshillimi të shkurtër, trupi gjykues vendosi që seanca të vazhdojë e mbyllur për publikun dhe mediat, për shkak të dëgjimit të një dëshmitari të mbrojtur, i identifikuar si F1.
Gjyqtari Arben Hoti bëri të ditur se masat teknike si ndryshimi i zërit dhe pamjes nuk janë të mjaftueshme për të garantuar fshehjen e identitetit të dëshmitarit, duke shtuar se ekziston rreziku i zbulimit të tij për shkak të natyrës së rastit.
“Aprovohet propozimi i Prokurorisë që me rastin e dëgjimit të dëshmitarit F1 të përjashtohet publiku dhe mediat, pasi masat e ndryshimit të fotografisë dhe zërit nuk janë të mjaftueshme. Bazuar në rrethanat e rastit, ka gjasa që të zbulohet identiteti i tij. Andaj nga ky moment kërkoj ta lironi sallën,” u shpreh gjyqtari.
Ky vendim lidhet me procesin gjyqësor për ngjarjet e ndodhura më 24 shtator 2023 në fshatin Banjska të komunës së Zveçanit, ku një pjesëtar i Policisë së Kosovës mbeti i vrarë, ndërsa disa persona të armatosur humbën jetën në përleshje.
Rasti vazhdon të trajtohet si një ndër më seriozët që lidhen me sigurinë në veri të Kosovës, dhe dëshmia e dëshmitarit F1 pritet të ketë rëndësi të veçantë në zbardhjen e detajeve të sulmit dhe përfshirjen e të dyshuarve.
