Policia e Kosovës dhe misioni paqeruajtës i NATO-s, KFOR, kanë zhvilluar një ushtrim të përbashkët në pjesën veriore të Republikës së Kosovës, me qëllim të forcimit të bashkëpunimit dhe rritjes së gatishmërisë operacionale.
Sipas një njoftimi zyrtar, ushtrimi është realizuar mbi bazën e një planifikimi të detajuar dhe është ekzekutuar me sukses, duke demonstruar nivel të lartë të ndërveprueshmërisë dhe koordinimit ndërmjet dy institucioneve të sigurisë.
“Policia e Kosovës dhe KFOR-i mbeten të përkushtuara në promovimin dhe ruajtjen e një ambienti të qetë dhe të sigurt për të gjithë qytetarët e Republikës së Kosovës,” thuhet në komunikatë.
Ky aktivitet është pjesë e përpjekjeve të vazhdueshme për të përmirësuar kapacitetet e reagimit të shpejtë dhe përballjes me sfidat potenciale në fushën e sigurisë, duke reflektuar angazhimin e përbashkët për stabilitet afatgjatë në vend.
