Pekini ka reaguar fuqishëm ndaj operacionit ushtarak të Shteteve të Bashkuara në Venezuelë, ku forcat amerikane kryen sulme në territorin venezuelian dhe kapën Presidentin Nicolás Maduro dhe gruan e tij, duke i dërguar jashtë vendit, një veprim që ka shkaktuar reagime ndërkombëtare të ashpra.
Në një deklaratë zyrtare të Ministrisë së Jashtme kineze, Kina shprehu “tronditje të thellë” dhe dënoi përdorimin e forcës nga SHBA-të, duke e cilësuar si një shkelje të qartë të së drejtës ndërkombëtare, cenim të sovranitetit venezuelian dhe një kërcënim për paqen e sigurinë në Amerikën Latine dhe Karaibe. Pekini tha se veprimet e Uashingtonit shkelin parimet e Kartës së Kombeve të Bashkuara dhe kërkoi që SHBA të respektojë sovranitetin e vendeve të tjera.
Kina gjithashtu i bëri thirrje SHBA-së që të sigurojë sigurinë personale të Nicolas Maduro dhe gruas së tij dhe t’i lirojë menjëherë, duke kërkuar që çështjet midis dy vendeve të zgjidhen përmes dialogut dhe negociatave, e jo me ndërhyrje ushtarake.
Ky qëndrim i Pekinit reflekton ndarjen e opinionit botëror mbi operacionin amerikan, ku disa vende e dënuan përdorimin e forcës dhe kërkuan respekt për të drejtën ndërkombëtare, ndërsa të tjerë e mbështetën veprimin e SHBA-së si një përpjekje kundër regjimit të Maduro-s dhe krimit.
