Një moment i pazakontë dhe emocional ndodhi në një sallë gjyqi në Georgia të SHBA-së, ku Regina Johnson, bashkëshortja e një viktime të një aksidenti me largim nga vendi i ngjarjes, përqafoi njeriun që vrau burrin e saj – një gjest që tronditi edhe vetë gjyqtarin.
Sipas ABC 7 Chicago dhe WSB-TV, gjyqtari i Gjykatës së Lartë të Qarkut Cherokee, Tony Baker, tha:
“Nuk besoj se kam parë ndonjëherë gruan e një viktime të përqafojë personin që i ka vrarë bashkëshortin.”
Ky koment erdhi pasi Regina Johnson përqafoi në sallë Joseph Tillman – burrin që vitin e kaluar përplasi për vdekje 78-vjeçarin Chuck Johnson, teksa ai po udhëtonte me biçikletë elektrike. Tillman ishte nën ndikimin e oksidit të azotit, i njohur si “gazi i qeshjes”.
Pamjet e publikuara nga WSB-TV tregojnë momentin kur Regina i afrohet Tillmanit në sallën e gjyqit, ia vendos dorën rreth qafës dhe të dy qëndrojnë të përqafuar për disa sekonda. Tillman ishte i përlotur dhe me fytyrë të skuqur. Regina i pëshpëriti në vesh:
“Të fal.”
Tillman i kërkoi falje, duke përsëritur mes lotësh:
“Më vjen shumë keq. Më vjen shumë keq.”
Në një deklaratë emocionale gjatë seancës së dënimit më 7 gusht, Tillman tha:
“Lutem që të ndjeni sinqeritetin në zemrën time kur them se më vjen vërtet shumë, shumë keq.”
Regina tregoi për WSB-TV se ky gjest ishte i udhëhequr nga besimi i saj:
“Zoti më tha se Joey kishte nevojë për një përqafim prej nëne. Ai ende nuk e di sa shumë e do Zoti.”
Ndërkohë, vajza e viktimës, Brittany McCarthy, mbajti një qëndrim më të ashpër ndaj Tillmanit:
“Unë do të jem gjithmonë vajza e një njeriu që ti e vrave. Zemra ime u thye për shkak të vendimit tënd për të vozitur nën ndikimin e drogës.”
Tillman pranoi fajësinë për disa akuza, përfshirë vrasje me automjet, largim nga vendi i aksidentit, deklaratë të rreme dhe drejtim të rrezikshëm të mjetit. Ai u dënua me 20 vjet burg, prej të cilave tre do t’i kalojë në burg, ndërsa pjesa tjetër mund të pezullohet nëse përfundon me sukses një program rehabilitimi dyvjeçar.
Avokati i tij, Paul Ghanouni, deklaroi se Tillman ka ndryshuar mënyrën e jetesës dhe është në rrugë të mirë për t’u rehabilituar.
Ky rast ka ngjallur shumë reagime në SHBA, si shembull i dhimbjes, faljes dhe drejtësisë që shkon përtej asaj ligjore.
