Presidenti rus Vladimir Putin ka ripërsëritur synimin e tij për të marrë plotësisht nën kontroll rajonin e Donbasit në Ukrainë, duke thënë se Moska do ta “çlirojë” zonën “me mjete ushtarake ose të tjera”.
Deklaratat u bënë në një intervistë për India Today, para vizitës së tij në New Delhi ku pritet të takohet me kryeministrin indian Narendra Modi.
Komentet e Putinit vijnë vetëm dy ditë pas takimit të tij në Kremlin me një delegacion amerikan. Ndërkohë, zyrtarët ukrainas janë ftuar në SHBA për të diskutuar me homologët amerikanë rreth një plani të mundshëm për t’i dhënë fund luftës.
Kremlini vazhdon të kërkojë që Ukraina t’i dorëzojë territorin e Donbasit, të cilin Rusia e ka aneksuar në mënyrë të paligjshme, por nuk e ka pushtuar plotësisht.
Kievi i ka kundërshtuar kategorikisht këto kërkesa, duke e bërë edhe më të paqartë perspektivën për një kompromis të afërt.
