Presidentja e Republikës së Kosovës, Vjosa Osmani, po qëndron për një vizitë zyrtare në Malajzi, ku është pritur me nderime të larta shtetërore nga kryeministri i këtij vendi, Anwar Ibrahim.
Ceremonia zyrtare e mirëseardhjes u zhvillua në kompleksin qeveritar Perdana Putra në qytetin administrativ të Putrajaya, ku Presidentja Osmani u prit me nderime ushtarake dhe flamuj të të dy vendeve.
Në një postim në rrjetin e saj social, Osmani ka shpërndarë disa fotografi nga ceremonia dhe ka falënderuar homologun e saj për pritjen:
“Faleminderit kryeministër Anwar Ibrahim për mikpritjen!”, ka shkruar ajo.
Perdana Putra është rezidenca zyrtare e zyrës së kryeministrit të Malajzisë dhe një ndërtesë simbolike e jetës politike në vend. Arkitektura e saj unike përfaqëson një kombinim të stilit islamik, malajzian dhe evropian, duke e bërë atë një vend të rëndësishëm për vizitat e nivelit të lartë.
Kjo vizitë vjen në kuadër të forcimit të marrëdhënieve dypalëshe ndërmjet Kosovës dhe Malajzisë. Të dyja vendet kanë shprehur interes për thellimin e bashkëpunimit në fusha si ekonomia, arsimi, teknologjia dhe diplomacia ndërkombëtare.
