Konflikti mes Elon Musk dhe Donald Trump ka marrë përmasa publike këtë javë, duke shkaktuar reagime të shumta në rrjetet sociale. Mosmarrëveshja shpërtheu pasi Musk kritikoi publikisht buxhetin e propozuar nga Trump dhe deklaroi se pa mbështetjen e tij, Trump nuk do të kishte fituar zgjedhjet, ndërsa demokratët do të kishin marrë kontrollin e Dhomës së Përfaqësuesve.
“Pa mua, Trump do t’i kishte humbur zgjedhjet… një mosmirënjohje e tillë,” shkroi Musk në një postim që më vonë u fshi.
Përplasja u thellua kur Musk aludoi se emri i Trump ndodhet në dokumente ende të pabëra publike që lidhen me financierin famëkeq Jeffrey Epstein. “Kjo është arsyeja e vërtetë pse ato nuk janë liruar ende,” shkroi ai.
Në këtë debat u përfshi edhe Ashley St. Clair, ish-e dashura e Musk dhe nëna e njërit prej fëmijëve të tij. Ajo postoi me ironi në Twitter:
“Hej @realDonaldTrump, më lajmëro nëse ke nevojë për këshilla për ndarjen,” duke përforcuar idenë e një “ndarjeje” të vërtetë politike dhe personale mes Musk dhe Trump.
St. Clair është bërë e njohur edhe më herët, kur në prill zbuloi se kishte refuzuar një ofertë nga Musk prej 15 milionë dollarësh për të mbajtur sekret ekzistencën e djalit të tyre, Romulus St. Clair, si dhe një shumë shtesë prej 100,000 dollarësh në muaj deri sa ai të mbushte 21 vjeç. Ajo tha se nuk e pranoi ofertën sepse “nuk donte që fëmija të ndihej si një sekret”.
Përplasja publike midis dy figurave të njohura si Trump dhe Musk, si dhe përfshirja e elementëve personalë në këtë debat, e ka kthyer çështjen në një spektakël të vërtetë politik dhe mediatik.
