Kryeministri në detyrë i Kosovës, Albin Kurti, ka shkaktuar debat pas një deklarate të bërë mbrëmë në një intervistë televizive, ku tha se Partia Demokratike e Kosovës (PDK) ka “katër ose pesë kryetarë” dhe se disa prej tyre duhet të shkojnë në Hagë për të marrë “instruksione politike”.
Kurti e ndërlidhi këtë koment me procesin gjyqësor në Gjykatën Speciale që po zhvillohet ndaj ish-presidentit Hashim Thaçi dhe ish-kryetarit të Kuvendit Kadri Veseli, të dy ish-udhëheqës të PDK-së dhe figura kyçe të Ushtrisë Çlirimtare të Kosovës.
Deklarata e Kurtit është kritikuar ashpër nga opinionisti Dardan Sejdiu, i cili në një intervistë në emisionin Rubikon të Klan Kosovës, tha se kryeministri po e dëmton betejën ligjore të ish-krerëve të UÇK-së për shkak të “kokëfortësisë së tij politike”.
“Kryeministri i Republikës së Kosovës del në televizor dhe thotë se do njerëz, që janë në Gjykatën Speciale, duhet të marrin instruksione politike. Për mua, kjo është dëshmi se ai nuk e di më çfarë po bën as çfarë po flet,” tha Sejdiu.
Sipas tij, një deklaratë e tillë nga një zyrtar i lartë shtetëror vetëm sa i vështirëson pozitat e të akuzuarve në Hagë, në një proces që ai e përshkroi si “betejë kombëtare”.
Kjo përplasje vjen në një kohë kur Gjykata Speciale në Hagë po vazhdon gjykimin ndaj Thaçit, Veselit dhe bashkëluftëtarëve të tyre nën akuza për krime lufte dhe krime kundër njerëzimit. Ndërkohë, PDK ka hedhur poshtë në vazhdimësi çdo sugjerim për ndikim nga jashtë dhe e ka konsideruar procesin si të motivuar politikisht.
Kjo situatë rikthen në qendër të vëmendjes tensionet e thella politike në Kosovë, përfshirë debatin për të kaluarën e luftës, drejtësinë tranzicionale dhe ndarjet e mëdha mes qeverisë aktuale dhe opozitës tradicionale.
