Bruksel, 23 Maj 2025 – Një aksion i koordinuar ndërkombëtar ka çuar në çmontimin e disa prej programeve më të rrezikshme keqdashëse (malware) në botë, njofton agjencia europiane e zbatimit të ligjit, Europol.
Në kuadër të operacionit të koduar “Endgame”, janë identifikuar 37 të dyshuar dhe janë lëshuar urdhërarreste ndërkombëtare për 20 persona. Janë mbyllur mbi 300 servera në të gjithë botën dhe janë neutralizuar 650 domene interneti të përdorura për përhapjen e malware-it.
Gjatë javës së operacionit, autoritetet kanë sekuestruar 3.5 milionë euro në formë kriptomonedhash, duke e çuar vlerën totale të kriptomonedhave të konfiskuara gjatë operacionit në 21.2 milionë euro.
Operacioni u realizua në bashkëpunim të ngushtë mes autoriteteve gjermane, franceze, holandeze, daneze, britanike, amerikane dhe kanadeze, me mbështetjen e Europol dhe Eurojust që nga viti 2024.
Çfarë është Malware?
Malware është një lloj softueri i krijuar nga kriminelët kibernetikë për të dëmtuar kompjuterët, rrjetet dhe për të vjedhur të dhëna. Ai mund të marrë forma të ndryshme si viruse, trojanë, spyware, adware apo ransomware, dhe shpesh përdoret për përfitime financiare ose për qëllime sabotazhi.
Malware shpërndahet përmes faqeve të internetit të infektuara, email-eve me bashkëngjitje të rrezikshme apo programeve të shkarkuara nga burime të pasigurta. Vetëm një klikim i gabuar mund të mjaftojë për të infektuar një sistem të tërë.
Autoritetet bëjnë thirrje për vigjilencë të lartë dhe përdorim të praktikave të sigurta në internet për të shmangur infektimin me malware.
