OKB kritikon Izraelin për bllokadën në Gaza: Ndihma humanitare nuk është e negociueshme
Sekretari i Përgjithshëm i OKB-së, António Guterres, ka kritikuar ashpër bllokadën izraelite në Rripin e Gazës, duke e cilësuar ndihmën humanitare si një çështje “të panegociueshme”.
Duke folur në debatin e hapur të Këshillit të Sigurimit për çështjen palestineze, Guterres u shpreh i alarmuar nga deklaratat e disa zyrtarëve izraelitë, të cilët sugjeronin se ndihma mund të përdoret si mjet presioni ushtarak.
“Ndihma humanitare nuk mund dhe nuk duhet të përdoret si një taktikë lufte. Ajo është një detyrim ligjor dhe moral,” tha Guterres, duke bërë thirrje për qasje të plotë, të sigurt dhe të papenguar për ndihmat në Gaza.
Kriza humanitare në Gaza është përshkallëzuar mes luftimeve intensive, me miliona civilë që përballen me mungesë të ushqimit, ujit dhe trajtimit mjekësor
Duke folur në debatin e hapur të Këshillit të Sigurimit mbi Palestinën, Guterres tha se është “i alarmuar” nga kjo qasje, duke theksuar se “ndihma është e panegociueshme” dhe se Izraeli ka detyrim të mbrojë civilët dhe të lehtësojë qasjen për ndihmat jetike.
“Situata mbetet e rëndë, me asnjë fund në horizont për vrasjet dhe mjerimin,” paralajmëroi shefi i OKB-së.
Ai theksoi se dështimi për të respektuar marrëveshjen e armëpushimit të 18 marsit ka shuar çdo shpresë për lirimin e pengjeve dhe shpërndarjen e ndihmave shpëtimtare.
Guterres gjithashtu ngriti shqetësimin për të ardhmen e zgjidhjes me dy shtete, duke paralajmëruar se ajo është “në rrezik të zvogëlohet deri në pikën e zhdukjes” dhe se angazhimi politik ndaj këtij qëllimi është “më larg se kurrë”.
“Bota nuk mund të përballojë të shohë zgjidhjen me dy shtete të zhduket. Liderët politikë përballen me zgjedhje të qarta: të heshtin, të pranojnë ose të veprojnë,” tha Guterres.
