Tiranë, 28 qershor 2025 – Agjencia Kombëtare e Mbrojtjes Civile ka raportuar se gjatë 24 orëve të fundit janë shënuar nëntë vatra zjarri në pesë bashki të Shqipërisë: Tiranë, Durrës, Kavajë, Lezhë dhe Berat.
Të gjitha vatrat janë neutralizuar me sukses, pa shkaktuar humbje në njerëz, por disa prej tyre kanë sjellë dëme materiale dhe një person të lënduar, raporton Klankosova.tv.
Detaje nga terreni:
- 6 raste përfshinë sipërfaqe me shkurre dhe barishte, duke shkaktuar djegien e rreth 0.5 hektarëve tokë.
- 2 raste u regjistruan në banesa: një në lagjen nr. 5 në Kavajë dhe një tjetër në fshatin Ishull Shëngjin. Në këtë të fundit, për shkak të një rrjedhjeje gazi, një grua u lëndua dhe u dërgua menjëherë në Spitalin e Traumës.
- Në një rast tjetër, një automjet privat u përfshi nga zjarri, duke pësuar dëme materiale.
Në aksionet për shuarjen e flakëve u angazhuan 9 forca operacionale dhe 64 automjete zjarrfikëse.
Rreziku mbetet i lartë në disa qarqe
Sipas Agjencisë së Mbrojtjes Civile dhe parashikimeve të Institutit të Gjeoshkencave, rreziku nga zjarret mbetet i lartë për qarqet Lezhë, Durrës, Tiranë dhe Fier, ndërsa në qarqet e tjera rreziku është i moderuar. Për ditën e sotme nuk parashikohen reshje shiu, çka rrit rrezikun e përhapjes së flakëve në raste të reja.
Autoritetet ftojnë qytetarët që, për shkak të temperaturave të larta, të jenë të kujdesshëm dhe vigjilentë, duke raportuar menjëherë çdo vatër të dyshuar pranë strukturave përkatëse.
“I gjithë mekanizmi i Mbrojtjes Civile, si në nivel vendor ashtu edhe qendror, është në gatishmëri të plotë dhe ndjek me vëmendje situatën”, thuhet në njoftimin zyrtar.
