Negociatat mes Shteteve të Bashkuara të Amerikës dhe Iranit për programin bërthamor të Teheranit kanë hyrë sot në një fazë vendimtare, me zhvillimin e raundit të pestë të bisedimeve në kryeqytetin italian.
I dërguari special i SHBA-së, Steve Witkoff, dhe ministri i Jashtëm iranian, Abbas Araghchi, pritet të marrin pjesë personalisht në takimin e shumëpritur, ndërsa shteti i Gjirit, Oman, vazhdon të luajë rolin e ndërmjetësit.
Sipas burimeve diplomatike, Uashingtoni po kërkon ndalimin e plotë të pasurimit të uraniumit nga ana e Iranit – një kërkesë që konsiderohet thelbësore për të garantuar që Teherani nuk do të jetë në gjendje të zhvillojë armë bërthamore.
Nga ana tjetër, Irani ka refuzuar prerazi këtë kërkesë, por është shprehur i gatshëm të kufizojë më tej programin e tij bërthamor dhe të pranojë kontrolle ndërkombëtare më të rrepta.
Edhe pse të dyja palët kishin treguar optimizëm në fillim të negociatave, dallimet e thella dolën në pah gjatë raundit të fundit në Muscat të Omanit, veçanërisht mbi çështjen e pasurimit të uraniumit – një pikë kyçe e mosmarrëveshjes.
Ekspertët ndërkombëtarë e cilësojnë këtë fazë të negociatave si kritike, duke theksuar se vendimet që do të merren në ditët në vijim mund të përcaktojnë fatin e marrëdhënieve SHBA–Iran për vitet që vijnë.
