Islamabad / New Delhi – Tensionet mes Indisë dhe Pakistanit kanë arritur një pikë kritike pas një përplasjeje të hapur ushtarake në rajonin e kontestuar të Kashmirit. Ministri pakistanez i Mbrojtjes, Khawaja Asif, deklaroi sot se Forcat Ajrore të Pakistanit kanë rrëzuar pesë avionë të Forcave Ajrore Indiane, përfshirë tre Rafale, një MiG-29 dhe një SU-30, në përgjigje të një sulmi me raketa të kryer nga India.
“Avionët u rrëzuan ndërsa përpiqeshin të godisnin objektiva në territorin pakistanez duke qëndruar në hapësirën ajrore indiane,” thanë burime të sigurisë pakistaneze për mediat.
Zëdhënësi i ushtrisë pakistaneze, gjenerallejtënant Ahmed Sharif Chaudhry, konfirmoi më herët rrëzimin e të paktën dy avionëve dhe shtoi se sulmet indiane kanë shkaktuar të paktën tetë të vrarë dhe 35 të plagosur në qytetet Bahawalpur, Muridke, Bagh, Muzaffarabad dhe Kotli.
Nga pala indiane nuk ka pasur ende një reagim zyrtar për rrëzimin e avionëve.
Përshkallëzimi vjen pas një sulmi të 22 prillit në Pahalgam, në Kashmirin e administruar nga India, ku mbetën të vrarë 26 persona. India akuzoi Pakistanin për përfshirje në këtë akt, ndërsa Islamabadi i mohoi kategorikisht pretendimet.
Në këtë klimë të tensionuar, Sekretari i Shtetit i SHBA-së, Marco Rubio, ka deklaruar se është në kontakt me zyrtarë të lartë të sigurisë nga të dy vendet. “Po e monitoroj situatën nga afër. SHBA apelon për përmbajtje dhe zgjidhje paqësore,” shkroi ai në platformën X.
Në dritën e zhvillimeve, Pakistani ka mbyllur hapësirën e tij ajrore për 48 orë, ndërsa India ka pezulluar operacionet komerciale në disa aeroporte veriore, përfshirë atë të Srinagarit.
Ky përshkallëzim i fundit ka ngjallur shqetësime ndërkombëtare për rrezikun e një konflikti të hapur mes dy fuqive bërthamore në rajon.
