Kompania Meta, pronare e platformave Facebook dhe Instagram, ka njoftuar se nga tetori do të ndalojë plotësisht reklamimin politik dhe zgjedhor në vendet e Bashkimit Evropian.
Ky vendim vjen në përgjigje të rregullores së re të BE-së për Transparencën dhe Synimin e Reklamimit Politik, që hyn në fuqi më 10 tetor 2025. Ligji i ri kërkon që platformat digjitale të etiketojnë qartë reklamat politike: të shënojnë se kush i ka paguar, për cilat zgjedhje bëhet fjalë dhe sa është shpenzuar. Mosrespektimi i këtyre rregullave mund të sjellë gjoba deri në 6% të xhiros vjetore të kompanisë.
Kjo lëvizje e Metës pason një vendim të ngjashëm të Google nga nëntori i kaluar dhe pasqyron qartazi shqetësimin e gjigantëve të teknologjisë për përballjen me rregullat e reja të ashpra të BE-së, të vendosura për të ndaluar dezinformimin dhe ndërhyrjet e huaja në proceset zgjedhore.
Meta thotë se vendimi është një masë e përkohshme për të shmangur pasigurinë ligjore dhe për të përshtatur sistemet e saj ndaj kërkesave të reja.
