Trazirat në Los Angeles kanë hyrë në ditën e katërt, ndërsa presidenti Donald Trump ka urdhëruar vendosjen e forcave shtesë ushtarake në një përshkallëzim të rrallë të pranisë federale në qytet. Task Forca 51 – njësi e përbërë nga 2,100 pjesëtarë të Gardës Kombëtare dhe 700 marinsë amerikanë – është vendosur për të siguruar “mbulim të vazhdueshëm të zonës”, siç thanë zyrtarët.
Kjo lëvizje vjen në një moment kur tensionet mes Shtëpisë së Bardhë dhe autoriteteve të Kalifornisë janë rritur ndjeshëm, pas një sërë arrestimesh të realizuara nga Zyra e Imigracionit dhe Doganave (ICE). Aksionet e ICE kishin në shënjestër punëtorët migrantë, çka ndezi zemërimin e komuniteteve lokale dhe organizatave të të drejtave të njeriut.
Protestat, të cilat fillimisht ishin paqësore, u kthyen në të dhunshme pas përplasjes me forcat e rendit. Gaz lotsjellës, plumba gome dhe bllokimi i qendrës së Los Angeles janë tashmë realitet i përditshëm. Autoritetet kanë shpallur zonën urbane si “grumbullim të paligjshëm”, ndërsa banorët shprehin frikë dhe pasiguri për ditët në vijim.
Disa analistë shohin këtë si një përpjekje të administratës Trump për të forcuar kontrollin mbi territore “të padisiplinuara” politikisht, ndërsa të tjerë paralajmërojnë për një përplasje të mundshme institucionale mes qeverisë federale dhe shtetit të Kalifornisë.
