Heshtja e kryeministrit Kurti ndaj arrestimit të ish-policit Arbnor Spahiu nga autoritetet serbe ka ngjallur reagime të ashpra. Avokati i njohur, Arianit Koci, ka kritikuar ashpër Kurtin për selektivitetin në mbrojtjen e qytetarëve të Kosovës jashtë vendit.
Në një postim të fuqishëm publik, Koci shpreh indinjatën e tij për mungesën e reagimit nga ana e kryeministrit në detyrë, Albin Kurti, për rastin e Spahiut, duke rikujtuar protestën publike të këtij të fundit në raste të tjera, ku të arrestuarit ishin të afërt me partinë në pushtet.
“Gabim. Shumë gabim,” shkruan Koci, duke theksuar se Arbnor Spahiu, ish-pjesëtar i Njësisë Speciale, ndodhet në paraburgim në Serbi pa asnjë provë, vetëm për shkak se është shqiptar.
Koci sqaron se Spahiu nuk ka qenë pjesëtar i Policisë së Kosovës në kohën kur ndodhi sulmi terrorist në Banjskë, për të cilin po përpiqet padrejtësisht të implikohet nga Serbia.
“Të gjitha provat i kam dërguar në gjykatë. Serbia po mundet sepse Kosova po hesht. Ose po zgjedh të flasë selektivisht,” shprehet me shqetësim Koci.
Ai përfundon duke premtuar se nuk do ta lërë vetëm asnjë qytetar të Kosovës, pavarësisht rrezikut, duke i kujtuar shtetit rolin që duhet të ketë në mbrojtjen e dinjitetit të secilit qytetar të saj.
Kjo deklaratë e fuqishme vjen në një moment kritik për marrëdhëniet Kosovë-Serbi dhe ngrit çështjen e mosbarazisë në trajtimin e rasteve të ndjeshme kombëtare. Opinioni publik tashmë pret me interes nëse do të ketë ndonjë reagim nga zyrtarët më të lartë të shtetit.
