Prishtinë, 28 gusht 2025 – Përveç zhvillimeve politike në skenën vendore, vëmendja e opinionit publik në Kosovë është zhvendosur drejt zhvillimeve brenda Lëvizjes Vetëvendosje (VV), pas dorëheqjes së ministrit të Infrastrukturës, Liburn Aliu, dhe polemikave që kanë shpërthyer rreth punimit shkencor të kryetarit të ri të Kuvendit, Dimal Basha.
Gazetarja Ardiana Thaçi në emisionin “Ora Shtatë” në Klan Kosova deklaroi se Liburn Aliu nuk ka pranuar të jetë pjesë e Kryesisë së re të VV-së dhe më pas ka dhënë dorëheqje nga posti i ministrit, një vendim që ai e bëri publik përmes një postimi në Facebook. Sipas Aliut, dorëheqja lidhet direkt me zgjedhjen e Dimal Bashës si kryetar i Kuvendit të Kosovës.
Megjithatë, analistja Magbule Shkodra e cilëson këtë dorëheqje si të vonuar, duke thënë se ajo është rezultat i një vendimi të brendshëm të VV-së dhe jo akt i vetëdijshëm i Aliut. Ndërsa Arta Tahiri-Beqa theksoi se Aliu përfaqësonte “ADN-në e VV-së”, dhe largimi i tij reflekton pakënaqësi serioze brenda partisë.
Panelistet shprehën shqetësim për qasjen autokratike që, sipas tyre, po ndiqet brenda VV-së, duke theksuar se “në këtë parti flet dhe vendos vetëm një person – Albin Kurti”.
Një tjetër temë që ka ndezur debat publik është punimi shkencor i Dimal Bashës, ku ai shpreh qëndrime kritike ndaj Ushtrisë Çlirimtare të Kosovës (UÇK). Gazetarja Thaçi deklaroi se Basha, si bashkautor, është përgjegjës për përmbajtjen e punimit, ndërsa Tahiri-Beqa vlerëson se distancimi i tij aktual është një manovër politike pas marrjes së pozitës së lartë shtetërore.
“Mediat serbe kanë bërë festë dje, pasi thanë se kryeparlamentari i zgjedhur nga Albin Kurti është në vijë me Prokurorinë Serbe”, u shpreh Shkodra, duke shtuar se partitë politike duhet të jenë më të kujdesshme në përzgjedhjen e kandidatëve për deputetë.
Polemikat për punimin e Bashës rrezikojnë të përdoren edhe nga shtetet që kontestojnë rolin e UÇK-së. “Ky dokument tashmë mund të citohet nga kushdo, përfshirë edhe institucionet serbe”, paralajmëroi Thaçi.
Këto zhvillime kanë sjellë në pah tensione të brendshme në VV dhe rrisin presionin mbi liderin e partisë, Albin Kurti, në një moment kritik për organizimin dhe konsolidimin e partisë në prag të zhvillimeve të reja politike në vend.
