Këshilli për Mbrojtjen e të Drejtave dhe Lirive të Njeriut (KMDLNJ) ka reaguar ashpër ndaj rritjes së faturave të energjisë elektrike gjatë muajit dhjetor, duke e cilësuar atë si abuzim ekonomik ndaj qytetarëve të Kosovës. Organizata thotë se ka pranuar shumë ankesa nga qytetarët, sipas të cilave faturat janë mbi 70 për qind më të larta krahasuar me muajin paraprak.
KMDLNJ akuzon Zyrën e Rregullatorit të Energjisë (ZRRE) për fryrje të faturave në kundërshtim me ligjin dhe veprime kundër interesit publik, duke kërkuar hetim nga Prokuroria Speciale. Sipas reagimit, një vendim gjyqësor ka konstatuar diskriminim të qytetarëve, pa u ofruar kompensim për dëmet e shkaktuara.
Organizata e konsideron edhe Qeverinë e Kosovës bashkëpërgjegjëse për situatën, për shkak të mbështetjes institucionale ndaj ZRRE-së. Po ashtu, shprehen shqetësime për blerjen e energjisë me çmime të larta nga tregtarë të huaj, dyshime për korrupsion, licencime nepotiste dhe dhënie monopoli në tregun e energjisë.
KMDLNJ ka bërë thirrje për hetim të plotë të veprimtarisë së ZRRE-së, proceseve të licencimit dhe të gjitha kontratave për blerje dhe shitje të energjisë elektrike.
