Pekin, 29 Qershor 2025 – Ministria e Tregtisë së Kinës ka reaguar ashpër ndaj zhvillimeve të fundit në marrëdhëniet tregtare ndërkombëtare, duke paralajmëruar se çdo vend që arrin marrëveshje tregtare me Shtetet e Bashkuara në dëm të interesave kineze do të përballet me kundërmasa të vendosura nga Pekini.
Në një deklaratë zyrtare të shpërndarë për mediat, ministria theksoi se Kina “kundërshton fuqimisht çdo vend që sakrifikon interesat kineze në këmbim të lehtësimit të tarifave amerikane.” Sipas saj, një veprim i tillë do të konsiderohej i papranueshëm dhe do të nxiste përgjigje të menjëhershme dhe të ashpër nga ana e Kinës.
“Nëse ndodh një situatë e tillë, Kina nuk do ta pranojë atë dhe do të ndërmarrë kundërmasa vendimtare për të mbrojtur të drejtat dhe interesat e saj legjitime,” thuhet në deklaratë.
Ky qëndrim vjen në kohën kur Shtetet e Bashkuara po intensifikojnë negociatat me disa prej partnerëve të saj tregtarë, përpara afatit të fillimit të tarifave të reja reciproke në fillim të muajit korrik.
Ministria kineze e ka cilësuar këtë politikë të Uashingtonit si një “akt tipik të ngacmimit të njëanshëm që dëmton seriozisht sistemin tregtar shumëpalësh dhe prish rendin normal të tregtisë ndërkombëtare.”
Deklarata përfundon me një thirrje për qëndrueshmëri dhe sovranitet ekonomik, duke theksuar se “vetëm duke iu përmbajtur fort parimeve dhe qëndrimeve të veta, një vend mund t’i mbrojë vërtet të drejtat e tij legjitime.”
Zhvillimet vijnë mes shqetësimeve në rritje për përshkallëzimin e një lufte të re tregtare globale, me efekt të mundshëm në zinxhirët e furnizimit dhe stabilitetin ekonomik ndërkombëtar.
