Pekini ndërmerr operacione urgjente evakuimi për të shpëtuar mbi 1,600 qytetarë nga Irani dhe qindra të tjerë nga Izraeli
Pekini ka nisur një operacion urgjent për të evakuuar më shumë se 1,600 qytetarë të saj nga Irani dhe qindra të tjerë nga Izraeli, në përgjigje të përshkallëzimit të rrezikshëm të konfliktit mes dy vendeve, i cili ka alarmuar komunitetin ndërkombëtar.
Zëdhënësi i Ministrisë së Jashtme kineze, Guo Jiakun, konfirmoi të enjten për mediat se Kina është duke zhvilluar operacione intensive evakuimi, në bashkëpunim të ngushtë me autoritetet e Iranit, Izraelit, Egjiptit dhe Omanit, për të siguruar një dalje të sigurt për shtetasit kinezë.
Sipas Guo, Pekini ka mbajtur komunikim të vazhdueshëm me palët përkatëse për të shmangur viktima të mundshme në mesin e civilëve, ndërsa i bëri thirrje Izraelit që të ndalë menjëherë operacionet ushtarake dhe të shmangë përshkallëzimin e mëtejshëm të krizës. “Kërkojmë ndalimin e menjëhershëm të zjarrit nga të gjitha palët dhe garantimin e sigurisë së civilëve, përfshirë qytetarët e huaj që ndodhen në zonat e konfliktit”, deklaroi ai.
Tensionet në Lindjen e Mesme janë rritur ndjeshëm pas një sulmi ajror izraelit ndaj një centrali bërthamor iranian dhe si kundërpërgjigje, goditjes nga Irani të një spitali në territorin izraelit. Këto zhvillime kanë ndezur shqetësime për një përplasje të re të gjerë rajonale.
Evakuimet në terren
Ambasada kineze në Teheran ka paralajmëruar qytetarët që të largohen menjëherë, duke përdorur rrugët tokësore, ndërsa ka identifikuar pikat kufitare Astara (drejt Azerbajxhanit) dhe Bajgiran (drejt Turkmenistanit) si kalime të mundshme, megjithëse njoftoi për vonesa dhe mbingarkesë në këto pika. Po ashtu, autoritetet paralajmëruan për zgjatje të procedurave të dokumentacionit të udhëtimit dhe kufizime në kapacitetin e transportit.
Në Izrael, ambasada kineze njoftoi se evakuimi do të fillojë të premten me autobusë të organizuar në grupe, të cilët do të transportojnë qytetarët drejt pikës kufitare Taba, në jug të vendit, e cila ndodhet rreth 360 kilometra larg Tel Avivit. Prej aty, qytetarët do të kalojnë në territorin egjiptian, ku do të presin riatdhesimin.
Reagime ndërkombëtare
Këto zhvillime kanë rritur ndjeshëm presionin mbi komunitetin ndërkombëtar për të ndërhyrë në uljen e tensioneve. Analistët vlerësojnë se përplasja mes dy fuqive të mëdha në rajon, e përshkruar nga Izraeli si “veprim paraprak për vetëmbrojtje” dhe nga Irani si “kundërpërgjigje e domosdoshme”, mund të përshkallëzohet në një luftë të përhapur, me pasoja të rënda për stabilitetin global.
Kina, si një aktor me interesa të mëdha ekonomike dhe energjetike në Lindjen e Mesme, ka adoptuar një qëndrim neutral dhe kërkon zgjidhje diplomatike, duke theksuar rëndësinë e mbrojtjes së civilëve dhe garantimit të sigurisë ndërkombëtare.
