Tel Aviv/Teheran, 17 qershor 2025 – Ushtria izraelite njoftoi të martën se ka vrarë Ali Shadmanin, të cilin e identifikoi si shefin e shtabit të ushtrisë iraniane gjatë kohës së luftës dhe si komandantin më të lartë ushtarak të Iranit në këtë fazë të konfliktit.
Sipas raportimit të Al Jazeera, Shadmani ishte konsideruar “njeriu më i afërt” i liderit suprem iranian, Ayatollah Ali Khamenei.
Izraeli e kreu sulmin në Teheran, ndërsa nga ana iraniane ende nuk ka pasur reagim zyrtar.
Ali Shadmani kishte marrë detyrën vetëm katër ditë më parë, më 13 qershor 2025, pas vrasjes së paraardhësit të tij, gjeneral-lejtënant Gholam Ali Rashid, gjatë sulmeve fillestare izraelite mbi objektiva strategjike në Iran.
Të dy, Rashid dhe Shadmani, udhëhiqnin Shtabin Qendror të Khatam al-Anbiya, një njësi kyçe që koordinon veprimet ushtarake mes ushtrisë së rregullt dhe Gardës Revolucionare Islamike të Iranit.
