Hetimi ndaj prokurorit amerikan Jack Smith, i cili ka ngritur aktakuzat ndaj ish-presidentit Donald Trump, ka ngjallur reagime edhe në Kosovë, për shkak të rolit të tij si ish-kryeprokuror në Dhomat e Specializuara në Hagë. Në emisionin “Ora Shtatë”, Adnan Sogojeva, Ardian Gaxherri dhe Ardian Bajraktari diskutuan ndikimin e mundshëm të këtij hetimi në procesin gjyqësor ndaj ish-krerëve të UÇK-së.
Ardian Bajraktari u shpreh optimist se hetimi ndaj Smith mund të ndikojë në çështjen në Hagë, duke vënë në pikëpyetje integritetin e procesit.
Adnan Sogojeva shpreson që hetimet të shtrihen edhe në kohën kur Smith ishte në krye të Gjykatës Speciale, duke e konsideruar veprimin e tij si dëmtues për interesat e Kosovës, veçanërisht për ndalimin e marrëveshjes historike të Thaçit në SHBA.
Ardian Gaxherri, nga ana tjetër, ironizoi duke thënë se Smith do të ishte më i përshtatshëm si politikan apo afarist, duke sugjeruar se veprimet e tij janë të ndikuara nga interesa të ndryshme politike.
Pavarësisht hetimeve në SHBA, nuk ka ende ndonjë indikacion zyrtar se proceset në Gjykatën Speciale në Hagë do të pezullohen apo të preken drejtpërdrejt.
