Grupi palestinez Hamas ka dhënë një përgjigje pozitive ndaj një pjese të planit për armëpushim në Gaza të propozuar nga SHBA-ja, duke u shprehur i gatshëm të pranojë disa pika të dokumentit 20-pikësh dhe të rinegociojë të tjerat.
Ky zhvillim është mirëpritur nga liderët botërorë, të cilët e kanë cilësuar si një hap të rëndësishëm drejt paqes dhe lirimit të pengjeve.
Sekretari i Përgjithshëm i OKB-së, António Guterres, u bëri thirrje të gjitha palëve ta shfrytëzojnë këtë mundësi për t’i dhënë fund konfliktit tragjik në Gaza. Presidenti turk Erdogan e quajti përgjigjen e Hamasit “një hap konstruktiv dhe të rëndësishëm”, ndërsa kancelari gjerman Friedrich Merz tha se kjo është “mundësia më e mirë për paqe” që nga fillimi i konfliktit.
Presidenti francez Emmanuel Macron dhe kryeministrja italiane Giorgia Meloni theksuan nevojën për armëpushim të menjëhershëm dhe lirimin e të gjithë pengjeve, ndërsa kryeministri kanadez Mark Carney dhe lideri britanik Sir Keir Starmer bënë thirrje për zbatim të menjëhershëm të marrëveshjes.
Presidenti amerikan Donald Trump, përmes rrjeteve sociale, e cilësoi këtë si “një ditë të madhe për Lindjen e Mesme”, duke thënë se Izraeli duhet të ndalojë bombardimet në mënyrë që të shpëtohen pengjet dhe të ecet drejt paqes së përhershme.
Në deklaratën e saj zyrtare, Hamas tha se pas konsultimeve me udhëheqësinë, fraksionet palestineze dhe ndërmjetësuesit ndërkombëtarë, ka vendosur të mbështesë pikat kyçe të planit, përfshirë ndalimin e okupimit, lirimin e të burgosurve dhe hyrjen urgjente të ndihmës humanitare.
Kjo përgjigje erdhi pak orë pas afatit të vendosur nga Trump, i cili kishte paralajmëruar pasoja të rënda nëse nuk pranohej plani deri të dielën në orën 18:00, sipas kohës së Uashingtonit.
