Një ditë pas protestës që mblodhi mijëra qytetarë si shenjë pakënaqësie ndaj procesit gjyqësor në Hagë, përfaqësuesit e OVL – UÇK dhe organizatave të dala nga lufta kanë mbajtur konferencë për media.
Kryetari i OVL – UÇK, Hysni Gucati, ka thënë se kanë pasur dhe do të kenë takime me 22 ambasada dhe përfaqësuesit e BE-së, për të përçuar kërkesat e tyre për sipas tyre, padrejtësive që po bëhen në Gjykatën Speciale.
“Të gjithë ambasadorët që jemi takuar na kanë thënë se këto dokumente që i keni dorëzuar do t’i dërgojmë në qeveritë e vendeve tona. Ata e financojnë shumë Gjykatën Speciale dhe kanë thënë se do t’i shpërfaqin pakënaqësitë tona. Këtë fushatë që kemi bërë ne është dashur ta bënte Qeveria dhe jo ne si organizata jo-qeveritare”, ka thënë Gucati.
Mijëra qytetarë dje janë mbledhur në mbrojtje të ish-krerëve të UÇK-së dhe si kundërshtim për procesin gjyqësor të tyre. Kryetari i OVL-UÇK-së, Hysni Gucati, tha dje gjatë protestës se Gjykata Speciale po tenton të ndryshojë narrativën e luftës së Kosovës. Ai theksoi se veteranët nuk do të lejojnë ndryshimin e historisë. Gucati gjithashtu tha se më veteranët nuk kanë besim në këtë gjykatë.
Njëri ndër ish-themeluesit e UÇK-së, Ali Ahmeti, tha se kombi ynë historikisht ka qenë i bashkuar kur i është rrezikuar identiteti dhe dinjiteti.
