Gjykata Supreme e Shteteve të Bashkuara ka lejuar zbatimin e ndalimit të Presidentit Donald Trump për pjesëmarrjen e personave transgjinorë në shërbimin ushtarak, ndërsa vazhdojnë sfidat ligjore ndaj kësaj politike.
Vendimi i gjykatës prek një politikë të diskutueshme që, në mënyrë të nënkuptuar, përjashton personat transgjinorë nga forcat e armatosura amerikane. Tre gjyqtarët liberalë të Gjykatës Supreme shprehën kundërshtimin e tyre, duke argumentuar se masa duhet të mbetej e pezulluar deri në përfundimin e proceseve gjyqësore.
Ndalimi është pjesë e një vale më të gjerë kufizimesh ndaj të drejtave të personave transgjinorë të ndërmarra nga administrata Trump që prej fillimit të mandatit të tij të dytë në janar. Presidenti republikan ka firmosur një urdhër ekzekutiv në të cilin thekson se identiteti gjinor i ushtarëve transgjinorë bie ndesh me kërkesat për një “stil jetese të ndershëm, të vërtetë dhe të disiplinuar”, çka – sipas tij – dëmton gatishmërinë e ushtrisë.
Pas urdhrit presidencial, Sekretari i Mbrojtjes, Pete Hegseth, urdhëroi çdo degë të ushtrisë të përgatisë brenda 30 ditëve planin për identifikimin dhe largimin e ushtarëve transgjinorë nga shërbimi aktiv.
