Gjykata Kushtetuese e Kosovës është duke shqyrtuar me prioritet kërkesën për vlerësimin e kushtetutshmërisë së ndryshimit të mënyrës së votimit për zgjedhjen e kryetarit të Kuvendit gjatë seancës konstituive. Kërkesa është dorëzuar më 12 maj nga deputetja Time Kadrijaj dhe disa deputetë të tjerë të opozitës.
Megjithëse kanë kaluar më shumë se katër javë, Gjykata ende nuk ka dhënë ndonjë afat se kur do të dalë me aktgjykim. Sipas sekretarit të përgjithshëm të kësaj gjykate, Veton Dula, çështja është duke u trajtuar me prioritet dhe vendimi do të merret pasi të jenë shqyrtuar të gjitha aspektet kushtetuese. Ai theksoi se të gjitha palët dhe opinioni publik do të njoftohen në kohë për vendimin.
Kërkesa ka të bëjë me procedurën e votimit për kryetarin e Kuvendit, për të cilën Lëvizja Vetëvendosje insiston të zhvillohet me votim të fshehtë, pas dështimit të kandidates së saj, Albulena Haxhiu, për t’u zgjedhur me votim të hapur në gjashtë raunde të ndryshme.
Megjithatë, pavarësisht vendimit të mundshëm nga Kushtetuesja, kriza politike mbetet e thellë, pasi Kuvendi nuk ka arritur të konstituohet edhe pesë muaj pas zgjedhjeve të 9 shkurtit. Seanca konstituive është shtyrë tashmë për herë të 36-të, ndërkohë që nuk ka një marrëveshje mes partive për ndarjen e pushtetit.
Një mundësi tjetër që përmendet në skenën politike është që Presidentja e vendit, Vjosa Osmani, t’i drejtohet Gjykatës Kushtetuese me një kërkesë për interpretim më të gjerë lidhur me të drejtën e partisë fituese për të propozuar kandidatin për kryetar Kuvendi, veçanërisht nëse ajo nuk i ka 61 votat e nevojshme.
Në mungesë të një marrëveshjeje politike, edhe një vendim i qartë nga Kushtetuesja mund të mos mjaftojë për të zgjidhur ngërçin, ndërsa Kuvendi vazhdon të mos jetë funksional dhe procesi i formimit të institucioneve të reja mbetet i bllokuar.
