Berlin – Gjermania po harton plane të reja për zgjerimin e rrjetit të saj të bunkerëve dhe strehimoreve të mbrojtura nga bombat, në kuadër të përgatitjeve për një sulm të mundshëm ushtarak nga Rusia brenda katër viteve të ardhshme.
Ralph Tiesler, kreu i Zyrës Federale për Mbrojtje Civile dhe Ndihmë në Fatkeqësi (BBK), ka paralajmëruar se vendi nuk është i përgatitur mjaftueshëm për një konflikt të mundshëm dhe se është koha për një ndryshim të menjëhershëm në qasjen ndaj sigurisë kombëtare.
“Për një kohë të gjatë, në Gjermani ekzistonte një besim i përhapur se lufta nuk ishte një skenar për të cilin duhej të përgatiteshim. Kjo ka ndryshuar. Ne jemi të shqetësuar për rrezikun e një lufte të madhe agresioni në Evropë,” deklaroi Tiesler për gazetën Süddeutsche Zeitung.
Sipas tij, vendi duhet të ndërmarrë një përpjekje kombëtare për të identifikuar dhe përshtatur tunelet, stacionet e metrosë, garazhet nëntokësore, parkimet dhe bodrumet e ndërtesave publike në strehimore emergjente. Synimi është të sigurohet hapësirë mbrojtjeje për të paktën 1 milion qytetarë.
Tiesler shtoi se ndërtimi i objekteve të reja nuk është zgjidhje e shpejtë, pasi kërkon kohë të gjatë dhe fonde të mëdha. Për këtë arsye, autoritetet po fokusohen në rinovimin dhe përshtatjen e infrastrukturës ekzistuese.
Aktualisht, nga rreth 2,000 bunkerë dhe strehimore që ekzistojnë në Gjermani që nga koha e Luftës së Ftohtë, vetëm 580 janë funksionale. Këto strehime mund të strehojnë rreth 480,000 persona – më pak se 0.5% e popullsisë.
Në kontrast të thellë me këtë, Finlanda ka 50,000 strehimore që mbulojnë rreth 85% të popullsisë së saj – rreth 4.8 milionë njerëz.
Frika nga një përshkallëzim i mëtejshëm i agresionit rus në Ukrainë ka shtuar shqetësimet në shtetet baltike, Poloni dhe gjithashtu në Gjermani, se Moska mund të synojë hapjen e fronteve të reja në Evropë.
Agjencia BBK pritet të paraqesë një plan të detajuar për mbrojtjen civile gjatë kësaj vere.
