Forca e Sigurisë së Kosovës (FSK) është duke zhvilluar një stërvitje taktike me mortaja në zonën ushtarake të Bizës, në Shqipëri. Aktiviteti po realizohet në kuadër të planit të rregullt të trajnimeve dhe në bashkëpunim të ngushtë me Organizatën për Menaxhimin e Trajnimeve dhe Asistencës së Sigurisë (SATMO) të Ushtrisë së Shteteve të Bashkuara të Amerikës.
Në njoftimin zyrtar të FSK-së thuhet se kjo stërvitje ka për qëllim rritjen e gatishmërisë operative të njësive, si dhe forcimin e bashkëpunimit rajonal dhe ndërkombëtar.
“Ky aktivitet synon rritjen e gatishmërisë operative dhe forcimin e bashkëpunimit rajonal mes forcave tona dhe partnerëve ndërkombëtarë”, thuhet në komunikatë.
Fokus në aftësi specifike taktike
Stërvitja është ndarë në pjesë teorike dhe praktike, me fokus në tre komponentë kryesorë:
- Trajnimi me mortaja (Mortar Training)
- Kursi për udhëheqës të këmbësorisë dhe mortajave (Infantry Mortar Leader Course)
- Vëzhgues i përparmë (Forward Observer)
Gjatë ushtrimeve, pjesëtarët e FSK-së janë trajnuar në përdorimin e sigurt të mortajave, teknikat e shënjestrimit dhe të gjuajtjes, si dhe në procedurat e koordinimit dhe komunikimit ndërmjet njësive taktike dhe elementeve të zjarrit.
Partneritet i vazhdueshëm me SHBA-në
FSK thekson se bashkëpunimi me partnerët ndërkombëtarë, në veçanti me Ushtrinë Amerikane, është thelbësor për rritjen e kapaciteteve ushtarake dhe kontributin në stabilitetin rajonal.
“Ky bashkëpunim forcon kapacitetet profesionale të FSK-së dhe kontribuon në sigurinë dhe stabilitetin rajonal përmes trajnimit të sinkronizuar dhe bashkëpunimit të vazhdueshëm me partnerët tanë”, thuhet në njoftim.
Stërvitja në Biza pritet të vazhdojë edhe në ditët në vijim, me pjesëmarrje të instruktorëve dhe këshilltarëve ushtarakë ndërkombëtarë.
