Deputetja e Lëvizjes Vetëvendosje, Fitore Pacolli, po përballet me një valë të pazakontë akuzash dhe reagimesh publike, që nga rrjetet sociale e deri në rrugë. Për ditë të tëra, ajo është bërë objekt i konfrontimeve të drejtpërdrejta nga qytetarët, që e akuzojnë për përfitime të padrejta të familjarëve të saj nga buxheti i shtetit.
Në dy ditët e fundit, Pacolli është sfiduar në publik nga qytetarë të ndryshëm njëri prej tyre madje duke i dalë përpara me dokument në dorë dhe duke e akuzuar hapur për “hajni”.
“Për hajne, e ki me dokument. Nuk po të kërcënoj… Me dokument po ta them”, dëgjohet të thotë një qytetar në një video që po qarkullon gjerësisht në rrjete sociale.
Ky reagim nuk është i izoluar. Disa pamje të tjera e kanë treguar Pacollin të provokuar në ambiente publike, përfshirë kafene dhe në afërsi të Kuvendit.
Një çështje e qartë ligjore apo perceptim publik?
Akuza më e përhapur ndaj Pacollit lidhet me pretendime se familjarë të saj kanë përfituar kontrata publike apo fonde nga institucionet shtetërore. Deri tani nuk ka ndonjë hetim zyrtar të konfirmuar nga Prokuroria, por reagimi qytetar duket se po ushqehet më shumë nga perceptimi publik për lidhjet nepotike dhe mungesën e transparencës.
Fitore Pacolli, e njohur për qëndrimet e saj të forta brenda Vetëvendosjes dhe për kritikat e drejtpërdrejta ndaj partive të tjera për klientelizëm, po përballet tashmë me atë që dikur ia atribuonte kundërshtarëve: dyshime për përfitime personale dhe familjare nga pozita publike.
Çfarë po ndodh realisht me Pacollin?
Ekspertë të komunikimit politik vlerësojnë se përballja publike e një deputeteje me qytetarët në rrugë është tregues i uljes së besimit në politikë dhe mungesës së dialogut institucional.
“Kur qytetarët nuk besojnë më se institucionet i dëgjojnë, ata kalojnë në konfrontim të drejtpërdrejtë. Rasti i Fitore Pacollit është simptomë e një krize më të gjerë besimi”, thotë opinionistë të politikes.
Nga ana tjetër, mungesa e një përgjigjeje të qartë nga vetë deputetja, e lë hapësirën për spekulime dhe e zbeh mundësinë për të shuar zërat kundër saj.
A po i kthehet bumerangu Vetëvendosjes?
Nëse dikur Vetëvendosje ndërtonte kapital politik mbi zërin e rrugës dhe protestës, tani duket se një pjesë e atij zëri po kthehet kundër saj dhe rastet si ai i Pacollit mund të jenë sinjal se përqafimi i pushtetit ka filluar të krijojë pasoja edhe brenda bazës së saj.
Nëse nuk jepen sqarime të besueshme për akuzat, Vetëvendosja rrezikon të përballet me një erozion të ngadalshëm të besueshmërisë, veçanërisht në mesin e votuesve që dikur kërkonin drejtësi të pakompromis.
