Tirana po përgatitet për një nga sfidat më të ndjeshme sportive të viteve të fundit, teksa të shtunën do të zhvillohet ndeshja mes Shqipërisë dhe Serbisë, pjesë e eliminatoreve të Kupës së Botës 2026. Përtej rëndësisë sportive, ky takim shihet edhe si një provë madhore për institucionet shqiptare, të cilat kanë vënë në zbatim një plan sigurie të paprecedent.
Autoritetet kanë ngritur një perimetër të fortë kontrolli përreth stadiumit, ku do të përdoren kamera me teknologji të njohjes së fytyrës dhe sisteme antidron për të parandaluar çdo përpjekje për provokim apo incident.
Në një përpjekje për të ruajtur qetësinë publike, hyrja në stadium do të bëhet vetëm me bileta të personalizuara dhe me paraqitjen e dokumentit të identitetit. Rrugët kryesore përreth do të jenë të bllokuara për qarkullimin e automjeteve, ndërsa bizneset në zonë do të ndalojnë përkohësisht aktivitetin.
Një masë e veçantë është edhe ndalimi i qëndrimit në ballkone apo dritare me pamje nga stadiumi gjatë ndeshjes – një sinjal i qartë se çdo detaj është marrë në konsideratë për të garantuar një atmosferë të kontrolluar.
Ky është një test i rëndësishëm për Shqipërinë si mikpritëse, ku sporti kërkohet të mbizotërojë mbi çdo tension dhe ku siguria është prioritet absolut.
