Viktimat ranë nga një objekt në ndërtim Policia ka nisur hetimet për të zbardhur rrethanat.
Dy punëtorë të moshës madhore kanë humbur jetën të hënën në mëngjes si pasojë e një aksidenti të rëndë në vendin e punës, në një objekt ndërtimi në rrugën “Bardhyl Qaushi” në Gjakovë.
Lajmin e ka konfirmuar për Klan Kosova zëdhënësi i policisë për rajonin e Gjakovës, Sheremet Elezaj, i cili bëri të ditur se punëtorët kishin rënë nga një lartësi dhe nuk arritën t’i mbijetonin plagëve të marra.
“Sot rreth orës 08:15, jemi njoftuar se dy persona (meshkuj të moshës madhore) janë dërguar për trajtim mjekësor në Spitalin Rajonal në Gjakovë, dyshohet si pasojë e lëndimeve të pësuar në vendin e punës. Më pas është konfirmuar edhe vdekja e tyre,” tha Elezaj.
Sipas policisë, njësitë relevante kanë dalë menjëherë në vendin e ngjarjes dhe janë duke zhvilluar veprime hetimore për të zbardhur plotësisht rrethanat që çuan në këtë tragjedi.
Ende nuk është bërë e ditur nëse kompania ndërtuese kishte respektuar të gjitha masat e sigurisë për punëtorët, ndërsa autoritetet pritet të japin më shumë detaje pas përfundimit të hetimeve paraprake.
