Kosova mund të përballet me një “dimër elektoral”, nëse deri më 26 tetor mandatari Albin Kurti nuk arrin të formojë Qeverinë e re. Në atë rast, vendi mund të shkojë në zgjedhje të reja parlamentare, për herë të dytë brenda një viti.
Komisioni Qendror i Zgjedhjeve (KQZ) është aktualisht i fokusuar në përmbylljen e procesit të zgjedhjeve lokale dhe përgatitjen për raundin e dytë më 9 nëntor. Zëdhënësi i KQZ-së, Valmir Elezi, tha për KosovaPress se institucioni do të veprojë sipas mandatit kushtetues, pa u përfshirë në debate politike.
Ai pranoi se mbajtja e zgjedhjeve të reja qendrore në një periudhë të shkurtër do të ishte një sfidë për stafin, por KQZ është e gatshme të ndërmarrë të gjitha hapat e nevojshëm nëse shpallet një proces i ri zgjedhor.
Ndërkohë, votat e diasporës dhe ato për disa kuvende komunale janë ende në numërim, ndërsa balotazhi për disa komuna do të zhvillohet më 9 nëntor 2025.
