Deputetët e Lëvizjes Vetëvendosje kanë refuzuar të komentojnë rreth seancës konstituive të Kuvendit të Kosovës, e cila është parashikuar të mbahet sot në orën 11:00. Sipas raportimit nga vendi i ngjarjes nga gazetarja Qëndresa Bellagoshi, asnjë prej deputetëve nuk ka dhënë deklarata për media lidhur me zhvillimet e pritshme apo me emrin e mundshëm për kryetar/e të Kuvendit.
“Ishte deputeti Agim Bahtiri ai që kaloi pa dhënë asnjë koment, madje as përshëndetje,” raportoi Bellagoshi nga hyrja kryesore e Kuvendit. Ajo shtoi gjithashtu se deri në momentin e raportimit, asnjë nga deputetët nuk kishte hyrë përmes hyrjes së Presidencës, që shpesh përdoret në raste të ngjashme.
Kuvendi i Kosovës po përpiqet të konstituohet pas zgjedhjeve të fundit parlamentare, por procesi ka mbetur i bllokuar pas dy aktgjykimeve të Gjykatës Kushtetuese, të cilat kanë sjellë paqartësi ligjore dhe politike mbi hapat e mëtejshëm. Kjo është përpjekja e radhës për të zhbllokuar situatën dhe për të vënë në funksion legjislaturën e nëntë të Kuvendit.
Megjithatë, mungesa e transparencës dhe e komunikimit nga përfaqësuesit e partisë në pushtet po ngjall shqetësime lidhur me mungesën e konsensusit për postin e kryekuvendarit, një hap kyç për funksionalizimin e institucioneve të reja.
