Zëvendëskryeministri britanik David Lammy deklaroi sot se vendimi i Britanisë së Madhe për të njohur shtetësinë palestineze është një hap simbolik në drejtim të paqes, por paralajmëroi se zgjidhja me dy shtete mbetet ende një objektiv i largët.
Në një intervistë për Sky News, Lammy theksoi se “njohja është pjesë e procesit të paqes”, duke shtuar se kufijtë duhet të bazohen në ato të vitit 1967 dhe Jerusalemi të trajtohet si një qytet i përbashkët.
Ai përsëriti thirrjet për lirimin e pengjeve izraelite të mbajtura nga Hamasi dhe theksoi se ky grup “nuk mund të ketë rol në qeverisjen e ardhshme të Palestinës”.
Lammy kritikoi gjithashtu sulmet izraelite ndaj udhëheqësve të Hamasit në Katar, duke thënë se këto veprime, bashkë me planet në Bregun Perëndimor, vështirësojnë arritjen e një armëpushimi dhe bien ndesh me përpjekjet për një proces paqeje të qëndrueshëm.
