Edhe në seancën e sotme të Kuvendit të Kosovës nuk arriti të konstituohet legjislativi, pasi nuk u miratua propozimi për krijimin e komisionit zgjedhor – një hap i domosdoshëm për të mbajtur votimin e fshehtë për zgjedhjen e kryetares së Kuvendit. Kjo përbën dështimin e 26-të në radhë në këtë proces kyç pas zgjedhjeve parlamentare të 9 shkurtit.
Kryesuesi i seancës, Avni Dehari, i ftoi subjektet politike të propozonin anëtarët e tyre për komisionin zgjedhor, por propozimi nuk mori mbështetjen e nevojshme, duke shkaktuar ndërprerjen e procesit dhe bllokimin e formimit të institucioneve të reja.
Partia fituese, Lëvizja Vetëvendosje (LVV), vazhdon të insistojë me kandidaten e saj për kryetare të Kuvendit, Albulena Haxhiu, e cila nuk gjen përkrahje nga opozita – PDK, LDK dhe AAK kanë refuzuar ta votojnë atë.
Seancat zhvillohen çdo 48 orë, por mungesa e kuorumit dhe konsensusit po mbajnë të bllokuar një proces të rëndësishëm për stabilitetin institucional të Kosovës. Pa konstituimin e Kuvendit, formimi i qeverisë së re mbetet i pezulluar, duke rritur tensionet dhe pasigurinë politike në vend.
Seanca e radhës është planifikuar të vazhdojë më 5 qershor, por pa ndryshime në qëndrimet politike, perspektiva e përfundimit të këtij bllokimi duket shumë e largët.
