Nga takimi elektoral në Sarandë, Sali Berisha deklaroi se që nga viti 2013, çmimet e ushqimeve janë dyfishuar dhe se shqiptarët sipas tij janë qytetarët më të vjedhur në Europë.
Ai tha se sarandiotët po përjetojnë tiraninë e mjerimit dhe se pensionet e tyre janë qesharake.
“Saranda sot është qyteti i burrave dhe grave të moshuar, të cilët pasi kanë shkrirë jetën e tyre në këtë rreth, përjetojnë një mbijetesë me një pension të pamerituar. Sot, punëtori i ndërtimit, i fermës, mjeku, mësuesi, inxhinieri, profesionisti, jeton me një pension që vështirëson ushqimin e përditshëm, i detyron t’u thonë fëmijëve: kaq ka, këtu nuk ka më për ju”, tha Berisha.
Sipas Berishës, ekonomistët kanë treguar se nëse pensionet do të ndiqnin rritjen e çmimeve, ato do të duhej të ishin mbi 390 mijë lekë. “Por kjo nuk ndodhi sepse qytetarët u vodhën si askund tjetër në Europë,” tha ai.
“Pensionisti jeton çdo ditë më keq. I le pa ilaçe. Këtë javë nuk po i marr dot ilaçet. Cili është ai që mund të mbijetojë me një pension qesharak? Mos harroni, 50% e tyre nuk marrin më shumë se 170 mijë lekë. Si është e mundur që u rikthye skamja? Sepse çmimet janë rritur ndjeshëm, veçanërisht ushqimet bazë.”
Në fund, Berisha theksoi se programi i Partisë Demokratike bazohet në dy parime kryesore dhe u bëri thirrje qytetarëve që të mos e shohin si projekt partiak:
“Programi ynë bazohet në dy parime: paratë shqiptarëve dhe një mundësi e re për çdo qytetar. Mos e gjykoni si projekt politik, por si një projekt për çdo shqiptar”, tha ai.
