Prishtinë – Administrata Tatimore e Kosovës (ATK) ka arritur të mbledhë gjithsej 390.2 milionë euro të hyra tatimore gjatë katër muajve të parë të vitit 2025, duke shënuar një rritje prej 33.7 milionë euro apo 9.5% më shumë krahasuar me periudhën e njëjtë të vitit të kaluar.
Kjo rritje e konsiderueshme vjen si rezultat i përmirësimeve në transparencën institucionale dhe forcimit të partneritetit me tatimpaguesit. Në raportet e fundit ndërkombëtare, ATK është vlerësuar si një nga institucionet që ka bërë përparim të dukshëm në ndërtimin e besimit me publikun.
Ulja e evazionit tatimor dhe rritja e përmbushjes vullnetare janë faktorë kyç që kanë ndikuar në këtë performancë të lartë. ATK thekson se çdo përmirësim në mbledhjen e të hyrave kontribuon në reduktimin e ekonomisë joformale – një sfidë e përhershme për sistemin tatimor të Kosovës.
Institucioni vazhdon të investojë në modernizimin e proceseve, përfshirë reformimin e procedurave, digjitalizimin e shërbimeve dhe zhvillimin e infrastrukturës teknologjike. Këto masa synojnë të rrisin efikasitetin, qasjen dhe drejtësinë në administrimin tatimor.
ATK mbetet e përkushtuar që përmes këtyre reformave të vazhdueshme të kontribuojë në zhvillimin ekonomik të vendit dhe në ofrimin e shërbimeve cilësore për të gjithë tatimpaguesit e Republikës së Kosovës.
