Poreç, Kroaci – Karateistja nga Kosova, Lanika Rexhepi, shkëlqeu në Ligën e të Rinjve të organizuar në Poreç të Kroacisë, duke siguruar medaljen e bronztë në kategorinë kadete, +61 kg. Sipas njoftimit të Komitetit Olimpik të Kosovës, Lanika arriti të ngjitet në podium pas pesë fitoreve të njëpasnjëshme, duke treguar një nivel të lartë në një nga garat më prestigjioze të Federatës Botërore të Karatesë (WKF).
Në këtë kompeticion ndërkombëtar, ku garojnë sportistët më të talentuar të botës në moshat e reja, Kosova u përfaqësua edhe nga dy karateiste të tjera që shënuan rezultate të rëndësishme. Danina Rexhepi në grupmoshën U-14 (+52 kg) arriti katër fitore dhe përfundoi në vendin e pestë, ndërsa Diellza Mahalla në kategorinë U-21 përfundoi e shtata, duke fituar dy duela të rëndësishme në një konkurrencë shumë të fortë.
Këto rezultate tregojnë se karatea në Kosovë po rritet dhe po jep shenja të qarta për të ardhmen, me sportistë që po arrijnë rezultate ndërkombëtare dhe që premtojnë shumë suksese për vendin në arenën sportive globale.
