Prishtinë, 28 qershor 2025 – Sot, në Gazimestan, në periferi të Prishtinës, pritet të mbahet manifestimi tradicional për shënimin e Vidovdanit, festë fetare dhe historike e komunitetit serb. Në prag të zhvillimit të këtij tubimi, institucionet e sigurisë në Kosovë kanë paralajmëruar masa të forta operacionale për të garantuar rendin dhe sigurinë publike.
Policia: Të shmangen provokimet
Policia e Kosovës ka konfirmuar se ka ndërmarrë të gjitha masat e nevojshme për menaxhimin e situatës, përfshirë ruajtjen e rendit publik, orientimin e trafikut dhe kontrollin kufitar. Në një njoftim zyrtar, Policia ka theksuar se çdo pjesëmarrës duhet të respektojë ligjet dhe të shmangë çdo veprim provokues.
“Janë ndërmarrë masa të nevojshme planifikuese, koordinuese, parandaluese dhe operative në të gjitha departamentet dhe rajonet policore, për zhvillimin e qetë dhe pa incidente të manifestimeve në lokacionet e parapara”, thuhet në komunikatën e Policisë.
Autoritetet kanë mbajtur takime me përfaqësues vendorë dhe ndërkombëtarë për koordinim të plotë të planit operacional. Po ashtu, është paralajmëruar mundësia e bllokimeve të përkohshme të trafikut, për të cilat është kërkuar mirëkuptimi i qytetarëve.
Kurti: Beogradi po tenton destabilizim
Kryeministri në detyrë, Albin Kurti, gjatë mbledhjes së fundit të qeverisë, ka ngritur shqetësimin për rrezik të destabilizimit të situatës në vend, nëpërmjet keqpërdorimit të kësaj feste nga autoritetet e Serbisë.
“Beogradi zyrtar, që po përballet me protesta studentore dhe qytetare, po përpiqet të zhvendos vëmendjen duke eksportuar krizën e brendshme përmes provokimeve në Kosovë”, tha Kurti.
Sipas tij, janë duke u organizuar grupe nga Serbia, Mali i Zi dhe Bosnja e Hercegovina për të marrë pjesë në manifestim, të cilat tradicionalisht mbajnë simbole nacionaliste serbe dhe ruse, duke rrezikuar rendin dhe sigurinë.
Thirrje për qetësi dhe respektim të ligjit
Kryeministri ka bërë thirrje që komuniteti serb në Kosovë të mos bjerë pre e instrumentalizimeve politike dhe të ruajë karakterin fetar e paqësor të kësaj dite.
“Tubimet për Vidovdan duhet të organizohen në përputhje të plotë me ligjin dhe jo të shndërrohen në mjete të propagandës nacionaliste”, tha ai.
Institucionet e Kosovës janë të përkushtuara të garantojnë të drejtat e të gjitha komuniteteve, por kanë bërë të qartë se nuk do të tolerohen veprime që cenojnë sigurinë, rendin dhe paqen publike.
