Pas vdekjes së Ismail Qemali në fund të janarit 1919 në Peruxhia të Italisë, autoritetet në Vlorë organizuan një ceremoni madhështore lamtumire. Trupi i tij mbërriti në qytetin e lindjes disa ditë më vonë, ndërsa varrimi u zhvillua të mërkurën, më 12 shkurt 1919.
Që në orët e para të mëngjesit, qytetarët u mblodhën në sheshin e portit. Rreth orës 10:00, arkivoli i mbështjellë me flamurin kombëtar u vendos mbi një karrocë të tërhequr nga gjashtë kuaj. Dyqanet qëndronin të mbyllura dhe nëpër dyer e mure ishin vendosur njoftime zie me mbishkrimin: “Zi kombëtare për patriotin e madh Ismail Qemal”.
Në një fotografi të realizuar nga Kolë Maca në vitin 1919, pasqyrohet momenti kur paria shqiptare mban fjalime në nder të figurës së tij. Pjesëmarrja ishte e madhe dhe ceremonia u zhvillua me rregull të plotë, pa asnjë incident.
Veçori e kësaj ceremonie ishte mungesa e flamujve të tjerë shqiptarë, përveç atij që mbulonte arkivolin e Ismail Qemali, duke e bërë edhe më simbolike dhe solemne lamtumirën për një nga figurat më të rëndësishme të kombit shqiptar.
Fotografi Kolë Maca, i lindur në Shkodër në vitin 1882, e nisi karrierën si nxënës i Kol Idromeno, u trajnua më pas në Vjenë dhe hapi studion e tij të parë në Shkodër në vitin 1910. Ai jetoi dhe punoi në Vlorë deri në vitin 1921, përpara se të vendosej në Tiranë, ku vazhdoi veprimtarinë e tij artistike.
