Një vizitor në muzeun Centre Pompidou-Metz në Francë ka ngrënë veprën e njohur të artistit italian Maurizio Cattelan, “Komediani”, e cila përbëhet nga një banane e ngjitur në mur me ngjitës. Incidenti ndodhi më 12 korrik, por galeria sqaroi se veprat e tilla përmbajnë elemente të zëvendësueshme dhe banania u rikthye në vend pak minuta më vonë, sipas udhëzimeve të vetë artistit.
Artisti shprehu zhgënjim që vizitori konsumoi vetëm frutin, duke mos marrë parasysh pjesët e tjera të veprës, si lëvorja apo ngjitësi. Pavarësisht aktit, galeria nuk ka ngritur kallëzim penal.
Ky nuk është rasti i parë: që prej prezantimit të parë në Art Basel Miami në vitin 2019, “Komediani” është ngrënë disa herë nga vizitorë të ndryshëm në muze të ndryshëm në mbarë botën. Vepra u shit fillimisht për 120 mijë dollarë, ndërsa në vitin 2024, koleksionisti kinez Justin Sun e bleu në ankand për 6.24 milionë dollarë – dhe e hëngri vetë bananen.
Galeria franceze e përshkroi veprën si “ndoshta më të ngrënën e 30 viteve të fundit”, duke e kthyer një objekt të zakonshëm në një simbol ndërkombëtar të artit konceptual.
