Të dënuarat në Qendrën Korrektuese të Lipjanit kanë realizuar një gjest human duke ndarë dhurata për nxënësit me nevoja të veçanta të Shkollës Fillore “Haradin Bajrami” në Magurë, me rastin e festave të fundvitit.
Dhuratat iu dorëzuan nxënësve të Dhomës Burimore të kësaj shkolle, ku mësimet i ndjekin gjashtë fëmijë me nevoja të veçanta. Aktiviteti u realizua në bashkëpunim me institucionet përkatëse dhe u mirëprit nga komuniteti shkollor.
Sipas njoftimit të Shërbimit Korrektues të Kosovës, ky veprim kishte për qëllim ofrimin e mbështetjes morale dhe përcjelljen e një mesazhi solidariteti, kujdesi dhe empatie ndaj fëmijëve. Autoritetet theksuan se iniciativa të tilla kontribuojnë në përfshirjen sociale dhe promovojnë vlera humane dhe përgjegjësi shoqërore.
